Leik KR og ÍBV seinkað um tvo tíma

Klukkan 19:00 á morgun tekur KR á móti ÍBV á AVIS-vellinum í Laugardal. Sá leikur er liður í 6. umferð Bestu deildarinnar. Leikurinn átti upprunalega að hefjast klukkan 17:00. Ölduspáin er betri þegar líður á laugardaginn. Eyjamenn fara með Herjólfi á leikdegi, og er líklegt að það sé ástæðan fyrir færslu leiksins.

Fjórir leikir fara fram á morgun, dagskráin hefst með leik Vestra og Aftureldingar klukkan 14:00, KR mætir ÍBV klukkan 19:00 og klukkan 19:15 eru tveir leikir. ÍA heimsækir Val og Stjarnan tekur á móti Fram.

Leikur Stjörnunnar og Fram átti að fara fram á sunnudagskvöldið en var flýtt um sólarhring þar sem Stjarnan tekur á móti Tindastóli á sunnudagskvöldið í úrslitaeinvígi Bónus deildarinnar í körfubolta.