Carragher: Engin ástæða fyrir Liverpool að panikka

„Það er hægt að segja að hægt sé að styrkja miðsvæðið hjá Liverpool, ekki endilega með því að fjölga leikmönnum heldur með auknum gæðum og með því að bjóða upp á eitthvað annað en það liðið getur boðið upp á núna. Þá er ekki verið að skjóta á þá miðjumenn sem liðið er með, það er líka verið að horfa í aldurinn því menn eru að komast á fertugsaldurinn," sagði Carragher.

Jordan Henderson, Thiago Alcantara og Fabinho voru í byrjunarliðinu gegn Fulham. Henderson er 32 ára gamall, Thiago er 31 árs og Fabinho verður þrítugur á næsta ári. Thiago meiddist gegn Fulham og verður frá í sex vikur.

„Yngri og orkumeiri leikmenn verða að koma inn á einhverjum tímapunkti, þeir leikmenn eru til í hópnum, eru til vara eða meiddir."

„Ég er á því að Jurgen Klopp og Liverpool ættu bara að kaupa leikmann ef það er akkúrat sá leikmaður sem þeir vilja. Velgengni Liverpool á markaðnum má leiða til þess að menn eru ekki að panikka þegar þeir taka inn leikmenn, menn hafa ekki gert það að undanförnu, menn mega ekki gera það núna og ekki heldur í framtíðinni. Ef það er enginn miðjumaður sem þeir vilja þarna úti þá ætti ekki að taka neinn inn."

„En ef það er einhver sem þeir telja að sé með gæðin og er laus þá væri ég að sjálfsögðu til í að fá þann leikmann inn. En ekki panikka," sagði Carragher.