Andrea Belotti skoraði úr tveimur vítaspyrnum í fyrri hálfleik. Báðar spyrnurnar voru dæmdar fyrir hendi, þar sem varnarmennirnir voru óheppnir að verja með höndum.

Vinstri bakvörðurinn Ales Mateju fékk dæmda vítaspyrnu á sig og fékk gult spjald fyrir vikið. Seinna gula spjaldið fékk hann rétt fyrir leikhlé og því mættu tíu leikmenn Brescia út í seinni hálfleikinn, tveimur mörkum undir. Mario Balotelli var tekinn útaf í leikhlé til að fylla í skarðið í vörninni.

Alejandro Berenguer var skipt inná í liði Torino í síðari hálfleik og innsiglaði hann sigurinn með tvennu á sex mínútna kafla.

Þetta er mikilvægur sigur fyrir Torino sem er um miðja deild, með 14 stig eftir 12 umferðir. Brescia er í næstneðsta sæti, með sjö stig. Þetta var fjórða tap liðsins í röð.

Brescia 0 - 4 Torino
0-1 Andrea Belotti ('17, víti)
0-2 Andrea Belotti ('26, víti)
0-3 Alejandro Berenguer ('75)
0-4 Alejandro Berenguer ('81)
Rautt spjald: Ales Mateju, Brescia ('41)

Sveinn Aron Guðjohnsen var þá geymdur á bekknum er Spezia tapaði fyrir Pisa í Serie B.

Jafnræði ríkti með liðunum, heimamenn nýttu færi sín betur. Liðsfélagar Sveins voru einu marki yfir þegar fimm mínútur voru eftir af venjulegum leiktíma. Heimamenn náðu þó að snúa stöðunni við.

Spezia er við fallsvæðið, með 12 stig eftir 12 umferðir.

Pisa 3 - 2 Spezia
1-0 M. Marconi ('31)
1-1 A. Ragusa ('69)
1-2 A. Ragusa ('76)
2-2 R. Aya ('87)
3-2 S. Benedetti ('92)
Rautt spjald: M. Marconi, Pisa ('93)