Real Madrid tók á móti Girona í titilbaráttuslag spænska boltans í dag og sendu lærisveinar Carlo Ancelotti skýr skilaboð með frábærum stórsigri.

Það var aðeins eitt lið á vellinum og voru það Vinicius Junior og Jude Bellingham sem skinu skærast, þar sem brasilíski kantmaðurinn gerði fyrsta mark leiksins áður en hann lagði önnur tvö upp á meðan enski sóknartengiliðurinn skoraði tvennu.

Rodrygo komst einnig á blað í sigrinum sem var afar sannfærandi.

Real Madrid er komið með fimm stiga forystu á Girona og þar á eftir kemur Barcelona í þriðja sæti, ellefu stigum eftir Real en með leik til góða.