Afturelding tók á móti Stjörnunni í 8-liða úrslitum Mjólkurbikars karla, leiknum lauk með 3-1 sigri heimamanna. Fótbolti.net var á staðnum og ræddi við Guðmund Kristjánsson, leikmann Stjörnunnar, eftir leikinn.
Lestu um leikinn: Afturelding 3 - 1 Stjarnan
„Burtséð frá stöðunni í deildinni þá ætlum við okkar að fara langt í öllum keppnum þannig þetta eru gríðarleg vonbrigði. Við spiluðum fyrstu 35 mínúturnar bara flott og svo einhvern veginn missum við aðeins momentumið og þeir ganga aðeins á lagið. Svo byrjum við seinni hálfleik allt í lagi og svo fáum við mark á okkur og tvö strax og þetta riðlast aðeins hjá okkur eftir það.''
Leikur Stjörnunnar hrynur eftir um 60 mínútna leik og fá þeir á sig þrjú mörk eftir að hafa leitt í tæpan klukkutíma.
„Í þessum mörkum þá verður eitthvað sem riðlast og missum menn út úr stöðum og það verður vitlaus talning og þeir ná að nýta sér það. En mér fannst við vera í fínum málum fyrir það.''
Hvað vill Gummi segja við stuðningsmenn sem eru farnir að missa trúna á þjálfaranum og komnir með nóg af gengi liðsins á þessu tímabili?
„Ég skil að þeir séu svekktir því að gengið hefur ekki verið nógu gott en bara biðla til þeirra að halda áfram að mæta. Ef það er einhvern tímann sem við þurfum á stuðningsmönnunum að halda þá er það þegar á móti blæs. Ef við föllum niður á lægra level þá vonum við að þeir geri það ekki og við reynum að rífa okkur upp og vonumst eftir eins miklum stuðningi og hægt er.''
