Afturelding tók á móti Stjörnunni í 8-liða úrslitum Mjólkurbikars karla, leiknum lauk með 3-1 sigri heimamanna. Fótbolti.net var á staðnum og ræddi við Magnús Má Einarsson, þjálfara Aftureldingar, eftir leikinn.
Lestu um leikinn: Afturelding 3 - 1 Stjarnan
„Þetta var frábær liðsheild og trú hjá okkur. Það var skita að lenda undir eftir nokkrar mínútur en við vorum búnir að tala um það fyrir leik um að vera klárir í að bregðast við því sem kemur til okkar og við gerðum það svo sannarlega. Ég hafði allan tímann trú á að við myndum snúa þessu við.''
Með sigrinum er Afturelding komið í undanúrslit í bikarnum í fyrsta skipti í sögu félagsins.
„Við fórum í 8-liða úrslit í fyrra og svekktir að fara ekki lengra þá en nú erum við komnir í undanúrslit sem er frábært en við viljum meira, við viljum fara í úrslitaleikinn þannig ef við erum búnir að vinna fjóra leiki í þessari keppni þá erum við búnir með fjögur borð ef þetta væri tölvuleikur og það eru tvö borð eftir og við viljum vinna næsta borð í leiknum og komast í endakallinn sem er Laugardalsvöllurinn''
Hinn 41 árs gamli Birkir Már skoraði tvö mörk og spilaði á hægri kantinum í fjarveru Elmars Kára.
„Hann varðist frábærlega og hann kann það svo við vissum að hann gæti gert það, svo vissum við að hann spilaði kant þegar hann var yngri og gæti laumað inn marki en ég bjóst kannski ekki við tveimur frá honum. Hann skorar víst alltaf þegar það er Megavika þannig að það er geggjað að það sé Megavika núna, hrikalega ánægður með tímasetninguna á leiknum og þetta var bara skrifað í skýin.''
