Ítalía: Darmian tryggði ellefta deildarsigurinn í röð

Matteo Darmian, fyrrum leikmaður Manchester United, var í byrjunarliði Inter og tryggði liðinu 1-0 sigur gegn Cagliari í fyrsta leik dagsins í ítölsku deildinni.

Þetta var ellefti sigur Inter í röð í deildinni og er liðið komið með aðra hönd á eftirvæntan Ítalíumeistaratitil, sem hefur verið einokaður af Juventus undanfarinn áratug.

Antonio Conte hefur fengið mikið lof fyrir starf sitt hjá Inter og voru hans menn mun betri gegn Cagliari í dag. Darmian skoraði á 77. mínútu eftir stoðsendingu frá hinum vængbakverðinum, hinum feykiöfluga Achraf Hakimi.

Inter er með ellefu stiga forystu á toppi deildarinnar þegar aðeins átta umferðir eru eftir.

Cagliari er óvænt í afar slæmri stöðu í fallsæti, fimm stigum frá öruggu sæti.