Spá Fótbolta.net - 3. sæti: Valur

Spáin:
1. ?
2. ?
3. Valur 95 stig
4. FH 93 stig
5. KR 87 stig
6. Stjarnan 69 stig
7. KA 65 stig
8. Leiknir 47 stig
9. ÍBV 35 stig
10. ÍA 33 stig
11. Keflavík 19 stig
12. Fram 17 stig

Um liðið: Valur endaði í fimmta sæti á síðasta tímabili en liðinu hafði verið spáð Íslandsmeistaratitlinum eftir að hafa landað þeim stóra árið áður. Eftir að hafa leitt mótið fram í sautjándu umferð fór allt í skrúfuna og næstu fjórir leikir töpuðust í deild og einnig leikur gegn Vestra í bikarnum. Krafan í ár er klár, stefnt er á titilinn og það þarf ekki meira en að líta á leikmannnastyrkingarnar til að sjá það.



Þjálfari - Heimir Guðjónsson: Heimir er einn sigursælasti þjálfari landsins, kann að vinna titila og fór virkilega vel af stað sem þjálfari Vals. Honum tókst ekki að stöðva blæðinguna síðasta haust þegar á móti blés en fékk traustið frá stjórnarmönnum Vals og hefur fulla trú á því að hann sé rétti maðurinn til að ná í Íslandsmeistaratitilinn aftur á Hlíðarenda. Srdjan Tufegdzic tók næsta skref á sínum ferli, tók við sem þjálfari Öster og inn í staðinn fyrir Túfa kom Helgi Sigurðsson og aðstoðar hann Heimi með liðið.

Styrkleikar: Mikil breidd og öflugir leikmenn í öllum stöðum. Það eru áfram í hópnum fullt af mönnum sem kunna að vinna titla og kunna að vinna titla með Val. Fjárhagsstaða félagsins er öflug og þjálfarinn veit hvað þarf til þess að vinna leiki.

Veikleikar: Undirbúningtímabilið vekur upp margar spurningar, töp á móti Fram og KA að undanförnu og virkilega ósannfærandi frammistöður í Lengjubikarnum eftir að hafa unnið Reykjavíkurmótið. Slök úrslit og lágt sjálfstraust helst oft í hendur.

Lykilmenn: Hólmar Örn Eyjólfsson og Patrick Pedersen. Ef þessir tveir eiga gott tímabil þá er ansi líklegt að Valur verði Íslandsmeistari. Hólmar er fyrrum landsliðsmaður sem hefur spilað með einu besta liði Noregs undanfarin ár. Hann væri sennilega ennþá í landsliðinu ef hann gefði kost á sér. Patrick er einn besti markaskorarinn sem spilað hefur á Íslandi. Hann átti ekki gott tímabil í fyrra og Valsmenn þurfa að koma honum snemma í gang.

Hlaðvarpsþátturinn Ungstirnin mælir með: Orri Hrafn Kjartansson. Fæddur árið 2002 og kom frá Fylki í vetur. Hann er Árbæingur sem var á sínum tíma hjá Heerenveen í Hollandi. Orri er með mikla hæfileika og orkubolti sem þreytist ekki. Menn eru spenntir fyrir komu Orra á Hlíðarenda og bíða eftir að sjá hann í Valstreyjunni í sumar. Hlutverk Orra ætti að vera þokkalega stórt í sumar. Hann er að berjast um sæti í liðinu við Arnór Smárason og Hauk Pál sem þekkja það ágætlega að missa út leiki vegna meiðsla.

Spurningarnar: Er Guy Smit nægilega góður til að leysa Hannes af? Hver mun spila við hlið Hólmars í hjarta varnarinnar? Verður Aron Jó í tíunni? Ætlar Heimir að leita í reynsluna inn á miðsvæðinu eða horfir hann í hlaupagetu yngri leikmanna? Hversu öruggur er Heimir í starfi eftir slæman endakafla á síðasta tímabili?

Völlurinn: Origo völlurinn. Uppskeran var fín á heimavelli í fyrra. 23 stig af 33 mögulegum. Það er alltaf gaman að koma á Hlíðarenda og hugmyndin á bakvið Fjósið hefur heppnast mjög vel.

Fyrirliðinn segir - Haukur Páll Sigurðsson
„Þetta er allavega betri niðurstaða en í fyrra. Við stefnum hærra en þriðja sætið. Mér líst mjög vel á tímabilið, það verður skemmtilegt að sjá hvernig þessar breytingar koma út, fleiri leikir sem held ég allir hafa kallað eftir og það er mikil tilhlökkun og mikil spenna. Valur setur þau markmið að stefna á að berjast um alla þá titla sem eru í boði og það er engin undantekning á þessu tímabili."

Komnir
Aron Jóhannsson frá Póllandi
Ágúst Eðvald Hlynsson frá Danmörku (á láni)
Guy Smit frá Leikni R.
Heiðar Ægisson frá Stjörnunni
Hólmar Örn Eyjólfsson frá Noregi
Jesper Juelsgård frá Danmörku
Orri Hrafn Kjartansson frá Fylki

Farnir
Christian Köhler í ÍA
Hannes Þór Halldórsson hættur
Johannes Vall í ÍA
Kaj Leo í Bartalsstovu í ÍA
Kristinn Freyr Sigurðsson í FH
Magnus Egilsson til Færeyja
Sverrir Páll Hjaltested til Kódrengja (á láni)

Fyrstu fimm leikir Vals:
19. apríl Valur - ÍBV
24. apríl Keflavík - Valur
30. apríl Valur - KR
6. maí FH - Valur
11. maí Valur - ÍA

Hin hliðin:
Sverrir Páll Hjaltested
Sigurður Dagsson

Sterkasta byrjunarliðið að mati Fótbolta.net:


Aðrir leikmenn:
Heiðar Ægisson - 4
Sebastian Hedlund - 6
Haukur Páll Sigurðsson - 7
Arnór Smárason - 8
Sigurður Egill Lárusson - 11
Andri Adolphsson - 17
Orri Sigurður Ómarsson - 20
Ágúst Hlynsson - 22
Sveinn Sigurður Jóhannesson - 25
Sigurður Dagsson - 26
Bele Alomerovic - 28
Bjarmi Kristinsson - 29
Ólafur Flóki Stephensen - 30
Almarr Ormarsson - 33

Spámennirnir: Aksentije Milisic, Brynjar Ingi Erluson, Egill Sigfússon, Elvar Geir Magnússon, Guðmundur Aðalsteinn Ásgeirsson, Hafliði Breiðfjörð, Sverrir Örn Einarsson, Sæbjörn Þór Þórbergsson Steinke, Tómas Þór Þórðarson og Úlfur Blandon