Ósáttur með hugarfar Trossard sem spilar ekki gegn Liverpool

„Trossard verður ekki með í komandi leik. Á æfingu fyir síðasta leik, þegar hann komst að því að hann ætti ekki að spila, þá yfirgaf hann æfinguna án þess að segja nokkuð við mig. Ég sagði við hann að ég væri ósáttur við þessa framkomu," segir De Zerbi.

„Hann veit hvað ég fer fram á, ef hann vill spila fyrir mig þarf hann að sýna vinnusemi, hann þarf að hlaupa og hugarfarið þarf að vera rétt."

Það eru auknar líkur á því að Trossard yfirgefi Brighton, ef ekki núna í janúar þá í sumarglugganum.

Tottenham er meðal félaga sem hafa áhuga á Trossard en samningur leikmannsins rennur út í sumar. Brighton ku þó geta virkjað ákvæði um framlengingu um eitt ár til viðbótar.

Trossard var ekki með í 5-1 sigri gegn Middlesbrough í bikarnum á laugardag en De Zerbi sagði ástæðuna vera meiðsli.

Síðan Trossard gekk í raðir Brighton frá Genk árið 2019 hefur Trossard skorað 25 mörk og átt 14 stoðsendingar fyrir félagið.

Fréttin hefur verið uppfærð.