Spá Fótbolta.net fyrir Bestu kvenna: 10. sæti

Spáin:
1. ?
2. ?
3. ?
4. ?
5. ?
6. ?
7. ?
8. ?
9. ?
10. Fram, 17 stig

Um liðið: Það er ekkert sérlega langt síðan Fram setti á laggirnar kvennalið sitt í núverandi mynd en uppgangurinn hefur verið hraður og öflugur. Liðið fór með sigur af hólmi í 2. deild kvenna sumarið 2022 og fór liðið svo upp úr Lengjudeildinni 2024. Í fyrra spilaði liðið í Bestu deildinni og átti gott sumar þar sem falldraugurinn gleypti liðið ekki. Fram náði að bjarga sér nokkuð þægilega og var áttunda sætið niðurstaðan. Það hafa orðið miklar breytingar í vetur og meðal annars þjálfarabreytingar en Óskar Smári Haraldsson, sem hafði komið liðinu úr 2. deild í Bestu deildina, hvarf á braut og tók við Stjörnunni. Það hefur verið nokkuð rætt og ritað um það að Fram sé að draga saman seglin með kvennaliðið sitt og það hefur vakið ákveðnar spurningar. Grunnurinn er til staðar eftir góðan árangur undanfarinna ára og nú þarf að byggja á honum.

Þjálfarinn: Anton Ingi Rúnarsson er mættur í Úlfarsárdalinn eftir að Óskar Smári hætti störfum og tók við Stjörnunni. Anton Ingi er 29 ára og hefur starfað við þjálfun hjá Grindavík frá 2019. Hann þjálfaði kvennaliðið í tvö ár og var yfirþjálfari yngri flokka félagsins. Anton Ingi stýrði karlaliði Grindavíkur í síðustu tveimur leikjunum á síðasta tímabili en liðið náði að halda sér uppi í Lengjudeildinni. Núna stígur Anton út fyrir Grindavík og þjálfar í fyrsta sinn í Bestu deild kvenna. Hann er efnilegur þjálfari sem fær verðugt verkefni í hendurnar.

Álit Magga
Fótboltaþjálfarinn Magnús Haukur Harðarson er sérfræðingur Fótbolta.net í Bestu deild kvenna. Hann rýnir í öll liðin fyrir tímabilið sem er framundan. Magnús verður með hlaðvarpsþáttinn Uppbótartímann á Fótbolta.net í sumar þar sem farið verður yfir kvennaboltann á Íslandi á mannamáli.
Breidd og gæðaleysi verður liðinu að falli
„Eftir storm í vatnsglasi þegar Óskar Smári gekk út úr dal draumanna vegna þess að það átti að fara draga saman seglin mætir nýr þjálfari til leiks með fimm erlenda leikmenn."

„Liðið hefur sýnt það á undirbúningstímabilinu að þær geta varist vel en sóknarleikurinn hefur ekki verið upp á marga fiska og mun mæða mikið á Unu Rós, Brookelynn og Öldu Ólafs að búa til og skora mörkin. Sara Svanhildur er sá leikmaður sem ég er spenntastur fyrir hjá Fram í sumar en hún hefur þennan X factor sem Fram vanta til að stækka möguleika sína á að halda sér í deildinni."

„Ef Fram neglir fyrir markið, nær upp stemningu og fólk mætir á völlinn að þá geta draumar ræst."

Lykilmenn: Brookelynn Entz og Una Rós Unnarsdóttir
Brookelynn Entz var fyrsti leikmaðurinn sem Fram sótti fyrir komandi keppnistímabil. Hún er öflugur sóknarsinnaður leikmaður sem hefur spilað síðustu fjögur tímabil á Íslandi. Hún hefur verið í liði ársins í Lengjudeildinni þrjú ár í röð og hjálpaði Grindavík/Njarðvík að komast upp í fyrra. Núna þarf hún að sýna að hún geti blómstrað í deild þeirra bestu. Una Rós kom til Fram fyrir síðasta tímabil og var mjög öflug með liðinu, ein af bestu leikmönnum liðsins. Anton Ingi, nýr þjálfari Fram, þekkir hana líka vel eftir að hafa þjálfað hana í Grindavík. Una Rós þarf að stíga enn frekar upp í sumar.

Gaman að fylgjast með: Hildur María Jónasdóttir
Hildur María er á leið inn í sitt annað tímabil með Fram en hún tekur við enn meiri ábyrgð í sumar þar sem hún verður fyrirliði liðsins. Hildur spilar sem miðjumaður. Hún er uppalin hjá Breiðabliki en var hjá FH áður en hún gekk í raðir Fram. Faðir hennar, Jónas Grani Garðarsson, varð markakóngur í efstu deild með Fram árið 2007 en það væri ekki verra fyrir Fram ef Hildur myndi finna markaskóna í sumar.

Komnar:
Brookelynn Paige Entz frá Grindavík/Njarðvík
Krista Dís Kristinsdóttir frá Þór/KA
Sara Svanhildur Jóhannsdóttir alfarið frá Breiðabliki (var á láni)
Isabelle Rose Gilmore frá FHL
Katrín S. Vilhjálmsdóttir frá Aftureldingu
Kristín Magdalena Barboza frá Breiðabliki (var á láni hjá Haukum)
Hanna Faith Victoríudóttir frá Aftureldingu
Lara Margrét Jónsdóttir frá Tindastóli
Harpa Helgadóttir frá FH á láni
Taylor Hamlett frá FHL

Farnar:
Lily Anna Farkas í Grindavík/Njarðvík
Murielle Tiernan í Stjörnuna
Telma Steindórsdóttir í Stjörnuna
Kamilla Pickett
Dominique Flasza
Elaina La Macchia
Olga Ingibjörg Einarsdóttir í Breiðablik (var á láni)
Sara Dögg Ásþórsdóttir í Fylki
Katrín Ásta Eyþórsdóttir í KR (var á láni hjá Fylki)
Eyrún Vala Harðardóttir í Val



Fyrstu fimm leikir Fram:
25. apríl, Fram - ÍBV (Lambhagavöllurinn)
29. apríl, Breiðablik - Fram (Kópavogsvöllur)
5. maí, Fram - Þróttur R. (Lambhagavöllurinn)
11. maí, Fram - Víkingur R. (Lambhagavöllurinn)
20. maí, Valur - Fram (N1 völlurinn Hlíðarenda)

Spámennirnir: Alexander Tonini, Alexandra Bía Sumarliðadóttir, Anton Freyr Jónsson, Elíza Gígja Ómarsdóttir, Guðmundur Aðalsteinn Ásgeirsson, Kári Snorrason, Magnús Haukur Harðarson, Snæbjört Pálsdóttir, Sverrir Örn Einarsson, Sæbjörn Þór Þórbergsson Steinke.