Ólíklegt að Liverpool kaupi miðvörð á næsta ári

Liverpool hefur glímt við nokkra manneklu í vörninni þrátt fyrir að vera með þá Virgil van Dijk, Jeremy Jacquet, Ronald Araujo og Joe Gomez innan sinna raða.

Jacquet hefur heillað síðan hann tók við keflinu af Ibrahima Konate, sem gekk í raðir Real Madrid, á meðan Araujo hefur að mestu verið nýttur í hægri bakverði.

Samkvæmt Pearce er ekki í áætlunum Liverpool að sækja nýjan miðvörð á næsta ári. Félagið hyggst þess í stað treysta á þá leikmenn sem fyrir eru og samkvæmt enskum miðlum er stefnan að framlengja samning Van Dijk um að minnsta kosti eitt ár.

Þá er einnig gert ráð fyrir að Giovanni Leoni fái stærra hlutverk þegar hann snýr aftur eftir hnémeiðsli.

Liverpool á auk þess tvo afar efnilega varnarmenn í þeim Ifeanyi Ndukwe og Mor Talla Ndiaye, sem gætu látið að sér kveða á næstu árum.

Ndukwe átti að vera hluti af aðalliðshópnum á þessu tímabili en fékk ekki atvinnuleyfi þar sem hann hafði ekki safnað nægilega mörgum stigum til þess. Hann var því lánaður til Levante á Spáni og hefur nú náð þeim stigafjölda sem þarf til að fá að spila á Englandi.

Ndiaye leikur hins vegar með unglingaliði Liverpool og bíður þess að fá tækifæri með aðalliðinu.

Ef Van Dijk ákveður að framlengja ekki samning sinn gæti Liverpool þurft að endurskoða áætlanir sínar og leita að nýjum miðverði. Líklegasta niðurstaðan er þó talin sú að Hollendingurinn verði áfram hjá félaginu.