England: Sjálfmark reyndist bjargvættur Brighton

Það fór fram nokkuð skemmtilegur leikur í ensku úrvalsdeildinni í kvöld er Brighton og Crystal Palace áttust við á Amex vellinum, heimavelli Brighton.

Það er óhætt að segja að heimamenn í Brighton hafi verið sterkari aðilinn og fengu vítaspyrnu á 38. mínútu sem Pascal Gross tók.

Jack Butland var í marki Palace í kvöld og hann gerði sér lítið fyrir og varði spyrnu Gross og fylgdi hornspyrna í kjölfarið.

Brighton skoraði úr hornspyrnunni en Neal Maupay var dæmdur brotlegur og markið dæmt af með VAR.

Fyrsta mark leiksins var skorað á 69. mínútu en það voru gestirnir frá Palace sem gerðu það gegn gangi leiksins.

Conor Gallagher, lánsmaður frá Chelsea, skoraði markið og var um leið að gera sitt sjötta mark fyrir Palace í deildinni á tímabilinu.

Þetta mark dugði Palace hins vegar ekki og á 87. mínútu varð varnarmaðurinn Joachim Andersen fyrir því óláni að skora sjálfsmark til að tryggja heimaliðinu stig.

Eftir leikinn er Brighton í áttunda sæti deildarinnar með 28 stig og Palace er í því ellefta með 24.