Enn og aftur frestað hjá Jóa Berg og félögum - Áttu að mæta Leicester

Heimaleik Burnley gegn Leicester sem átti að vera á morgun hefur verið frestað vegna Covid tilfella og meiðsla hjá Burnley. Jóhann Berg Guðmundsson leikur með Burnley.

Leikurinn átti að vera klukkan 15 á morgun en þrír aðrir leikir ættu að fara fram á þeim tíma á morgun.

Það er orðið vanalegt að ýmsum leikjum sé frestað í ensku deildinni og nóg að gera hjá mótanefnd deildarinnar að finna nýja leikdaga. Þetta er 20. úrvalsdeildarleikurinn sem er frestað vegna Covid.

Burnley hefur orðið illa fyrir barðinu á frestunum og aðeins leikið sautján leiki, fæsta leiki af öllum liðum. Samkvæmt reglum ensku úrvalsdeildarinnar verða félög að spila ef þau hafa þrettán útleikmenn og einn markvörð tiltækan.