Ítalía: Meistararnir heppnir að sleppa með stig frá Flórens

Fiorentina og Juventus gerðu markalaust jafntefli í fyrsta leik helgarinnar í ítalska boltanum.

Lærisveinar Maurizio Sarri héldu boltanum þokkalega vel innan liðsins en náðu ekki að skapa sér mikið af færum. Douglas Costa fór meiddur af velli eftir átta mínútur og meiddist Miralem Pjanic svo rétt fyrir leikhlé.

Heimamenn komust nokkrum sinnum nálægt því að skora en heppnin var með Juventus. Þá átti Wojciech Szczesny góðan leik á milli stanganna þrátt fyrir slæm mistök í fyrri hálfleik þar sem hann var næstum búinn að gefa Fiorentina mark.

Franck Ribery var í byrjunarliði Fiorentina og skilaði góðri frammistöðu en tókst ekki að gera sigurmark.

Juve er á toppi deildarinnar með sjö stig eftir þrjár umferðir. Þetta var fyrsta stig Fiorentina sem tapaði fyrir Napoli og Genoa í fyrstu umferðunum.