Championship: Fyrrum vonarstjarna Liverpool með sigurmarkið í slagnum um Sheffield

Sheffield United vann 1-0 sigur á nágrönnum sínum í Sheffield Wednesday á Hillsborough-leikvanginum í ensku B-deildinni í dag.

United er í harðri toppbaráttu við Leeds og Burnley um efstu tvö sætin í deildinni á meðan Wednesday er að halda í vonina um að komast í umspil.

Það voru heimamenn sem voru ferskari til að byrja með. Michael Smith átti besta færi fyrri hálfleiksins er hann stangaði boltann í átt að marki en Michael Cooper, markvörður United, varði frábærlega og snemma í síðari hálfleik var Dean Windass nálægt því að skora en Harrison Burrows komst fyrir skotið í tæka tíð.

Sex mínútum síðar skoraði Rhian Brewster, sem var áður á mála hjá Liverpool, sigurmarkið af stuttu færi.

Brewster var talinn gríðarlega efnilegur hér árum áður og spáð miklum frama, en hann náði aldrei að brjóta sér leið inn í byrjunarlið Liverpool og var á endanum seldur til Sheffield United fyrir 20 milljónir punda árið 2020.

Þetta sigurmark var dýrmætt en það kom Sheffield United upp að hlið Leeds á toppnum þegar átta umferðir eru eftir. Bæði lið eru með 80 stig og kemur Burnley rétt á eftir með 78 stig.