Þýskaland: Lewandowski bjargaði stigi fyrir Bayern

FC Bayern mætti Hertha Berlin í fyrstu umferð nýs deildartímabils í Þýskalandi. Bayern hefur titil að verja sjöunda árið í röð.

Robert Lewandowski kom heimamönnum yfir í fyrri hálfleik eftir að Serge Gnabry slapp innfyrir vörnina á hægri vængnum og gaf lága fyrirgjöf.

Dodi Lukebakio, sem skoraði þrennu á Allianz Arena á síðustu leiktíð, átti næsta mark en það er þó skráð á Vedad Ibisevic. Skot Lukebakio fyrir utan teig fór í bakið á Ibisevic og í netið og tvemur mínútum síðar var Marko Grujic búinn að bæta við.

Bæjarar skiptu um gír í seinni hálfleik en áttu í erfiðleikum með að brjótast í gegnum þétta vörn gestanna. Lewandowski jafnaði þó leikinn á 60. mínútu þegar hann fiskaði vítaspyrnu með aðstoð myndbandstækni og skoraði sjálfur úr henni.

Meira var ekki skorað þrátt fyrir tilraunir heimamanna. Gestirnir frá Berlín geta verið sáttir með gott stig.

Þetta er í fyrsta sinn síðan 2011 sem Bayern vinnur ekki í fyrstu umferð deildarkeppninnar.