Ísland þarf toppsætið til að vera öruggt með að enda ekki í neðstu deild

Það eru tíu dagar í að Ísland hefji leik í riðli sínum í C-deild Þjóðadeildarinnar eftir að hafa fallið úr B-deildinni í síðustu útgáfu keppninnar. Eistland, Lúxemborg og Búlgaría eru með okkur í riðli.

Framkvæmdanefnd UEFA ákvað á dögunum að fækka deildunum í Þjóðadeildinni úr fjórum í þremur frá og með 2028. Nýtt fyrirkomulag verður tekið í notkun sem líkist Meistaradeildarfyrirkomulaginu svo þú ert ekki að mæta sömu þjóð heima og úti.

Til að vera öruggt með að komast upp í B-deildina og forðast það að leika í neðstu deild í næstu útgáfu verður íslenska liðið því að vinna riðilinn sem það er að fara í núna.

Ef annað sætið verður niðurstaðan mun Ísland fara í umspil gegn liði úr B-deild um hvort liðið verði í B-deildinni.