Fotbolti.net
16.11.26 - 18:53
Brynjar Ingi Erluson

Falleg kveðjustund þegar Ísland tryggði sér toppsætið

Aron Einar kvaddi landsliðið og jafnaði um leið landsleikjametið í sigrinum

Aron Einar kvaddi landsliðið og jafnaði um leið landsleikjametið í sigrinum

Canon

Mynd: Fótbolti.net - Haukur Gunnarsson

Eimskip
Ísland 3 - 0 Lúxemborg
1-0 Brynjólfur Willumsson ('25 )
2-0 Andri Lucas Guðjohnsen ('37 , víti)
3-0 Mikael Egill Ellertsson ('50 )
Lestu um leikinn
Ísland tryggði sér toppsæti D-riðils C-deildar Þjóðadeildarinnar með sannfærandi 3-0 sigri á Lúxemborg í kvöld. Sigurinn þýðir að Ísland er komið upp í B-deildina á ný og hefur jafnframt komið sér í góða stöðu í baráttunni um sæti í umspili fyrir Evrópumótið.

Fyrir leikinn var Guðjóns Þórðarsonar, fyrrum landsliðsþjálfara Íslands, minnst með mínútuþögn, en hann lést 71 árs að aldri. Þetta var falleg og virðuleg stund þar sem minning hans var heiðruð og glæsilegs þjálfaraferils hans minnst.

Sigurinn var í raun aldrei í hættu, en íslenska liðið hafði góð tök á leiknum frá upphafi og skapaði sér nokkur álitleg færi áður en fyrsta markið leit dagsins ljós á 25. mínútu.

Orri Steinn Óskarsson átti þá hörkuskot fyrir utan teig sem fór í þverslána og niður, að því er virtist inn fyrir marklínuna. Orri var þegar byrjaður að fagna, en Brynjólfur Andersen Willumsson tók enga sénsa, fylgdi skotinu eftir og skallaði boltann í netið.

Tólf mínútum síðar fengu Íslendingar vítaspyrnu þegar Orri átti skot sem fór í hönd varnarmanns gestanna og dómarinn benti á punktinn.

Andri Lucas Guðjohnsen steig á vítapunktinn og skoraði af öryggi. Þetta var sjötta mark hans í Þjóðadeildinni og er hann nú næstmarkahæstur í keppninni, en aðeins Harry Kane hefur skorað fleiri mörk.

Markið var jafnframt það sextánda hjá Andra fyrir íslenska A-landsliðið.

Staðan var því 2-0 í hálfleik og strákarnir voru ekki lengi að bæta við þriðja markinu eftir hlé.

Orri Steinn fékk þá boltann vinstra megin við vítateiginn, lék á varnarmann Lúxemborgar og lagði boltann út í teiginn á Mikael Egil Ellertsson sem stýrði honum af öryggi niðri í vinstra hornið.

Þetta var fjórða landsliðsmark Mikaels og annað mark hans í Þjóðadeildinni á þessu ári.

Ein fallegasta stund kvöldsins kom síðan þegar um tuttugu mínútur voru eftir, en þá kom Aron Einar Gunnarsson inn á í sínum síðasta landsleik.

Þetta var 113. landsleikur Arons og jafnaði hann þar með landsleikjamet Birkis Bjarnasonar. Sannarlega verðskulduð stund fyrir mann sem hefur gefið íslenskum fótbolta svo ótrúlega mikið í gegnum árin.

Aron klæddist treyju númer 14 við þetta sérstaka tilefni, en það var einmitt númerið sem hann bar þegar hann hóf feril sinn með A-landsliðinu.

Íslenska liðið sigldi sigrinum örugglega heim og tryggði sér toppsæti riðilsins með 14 stigum. Ísland er því komið aftur upp í B-deild Þjóðadeildarinnar og stendur jafnframt vel að vígi í baráttunni um sæti í umspili fyrir Evrópumótið.

Dregið verður í riðla fyrir undankeppni Evrópumótsins þann 6. desember í Belfast á Norður-Írlandi.
Orri Steinn og Mikael Egill fagna

Orri Steinn og Mikael Egill fagna

Canon

Mynd: Fótbolti.net - Haukur Gunnarsson

Andri Lucas skoraði sex mörk í sex leikjum

Andri Lucas skoraði sex mörk í sex leikjum

Canon

Mynd: Fótbolti.net - Haukur Gunnarsson

Slapp
Fotbolti.net

© Copyright 2002-2026 Fotbolti.net / Fotbolti Ehf. All rights reserved.