Það er margt hægt að segja um slakt gengi Manchester United undir stjórn Ole Gunnar Solskjær en norski stjórinn verður seint sakaður um að gefa ungum leikmönnum ekki tækifæri.

Það er ástæðan fyrir því að margir stuðningsmenn Rauðu djöflanna hafa trú á Solskjær. Það er partur af hefð félagsins að tefla fram uppöldum leikmönnum, þessi hefð náði sögulegu hámarki þegar '92 árgangurinn sprakk út undir stjórn Sir Alex Ferguson.

Manchester United gerði jafntefli við Everton um helgina og blossaði upp skemmtileg staðreynd að leikslokum: Þetta var leikur númer 4000 í röð þar sem Man Utd tefldi fram uppöldum leikmanni. Rauðu djöflarnir hafa verið með minnst einn uppaldann inná vellinum í hverjum einasta leik síðan 1937.

Þetta er ekki eina áhugaverða tölfræði Man Utd sem leit dagsins ljós eftir jafnteflið. Rauðu djöflarnir eru í sjötta sæti ensku úrvalsdeildarinnar með 25 stig.

Af þessum 25 stigum hafa 12 komið gegn þeim 14 liðum sem eru núna stödd fyrir neðan Man Utd á stöðutöflunni. Hin 13 stigin hafa öll komið gegn þeim 5 liðum sem eru fyrir ofan Rauðu djöflana.

Man Utd er nefnilega búið að leggja Manchester City, Tottenham, Chelsea og Leicester að velli á tímabilinu og gera jafntefli við Liverpool.

Tweet

Senda a Facebook Hafdu samband Senda frétt Prenta frétt Frétta leit