Allir þagna þegar Pearson labbar inn í herbergið

Watford hefur verið á mögnuðu skriði í ensku úrvalsdeildinni síðan Nigel Pearson tók við stjórnartaumunum. Liðið var í skítamálum á botni deildarinnar en undir Pearson hefur það náð að komast upp úr fallsæti.

Markvörðurinn Ben Foster hrósar Pearson í hástert og segir að hann hafi komið inn með meiri aga í leikmannahópinn.

„Stundum þarf að koma fram við fótboltamenn eins og þeir séu skólakrakkar og vera með smá hörku," segir Foster.

„Munurinn á Nigel og þeim sem voru á undan honum er sá að hann er stjóri en hinir voru þjálfarar. Nigel tekur stjórn á öllu í kringum liðið."