Spánn: Barcelona tókst ekki að vinna fallbaráttulið - Óvænt tap Atletico

Barcelona gerði 1-1 jafntefli gegn Getafe í La Liga í kvöld. Barcelona er án sigurs í síðustu fjórum leikjum og situr í þriðja sæti, fimm stigum frá toppnum, en Getafe er aðeins stigi fyrir ofan fallsæti.

Jules Kounde kom Barcelona yfir snemma leiks en hann fékk geggjaða sendingu frá Pedri og náði að koma boltanum yfir línuna. Á 34. mínútu var Mauro Arambarri réttur maður á réttum stað í teignum og jafnaði í 1-1.

Í seinni hálfleik komst Frenkie de Jong nálægt því að skora sigurmarkið en David Soria í marki Getafe varði frábærlega og liðin skiptu stigunum á milli sín.

Fyrr í dag fór topplið Atletico Madrid illa að ráði sínu og tapaði óvænt í grannaslag gegn Leganes. Eftir fimmtán leikja sigurgöngu Atletico var það Leganes sem skoraði eina mark leiksins í dag. Antoine Griezmann hefði getað bjargað stigi fyrir gestina í lokin en brást á vítapunktinum.

Atletico hafði mikla yfirburði í leiknum og var 65% leiktímans með boltann en misnotaði fjölda færa.

Atletico Madrid er með 44 stig, stigi á undan grönnum sínum í Real Madrid sem eiga leik til góða. Real mætir Las Palmas á morgun og getur komið sér á toppinn. Barcelona er í þriðja sæti með 39 stig.