Monza og Milan áttust við í nágrannaslag í lokaleik helgarinnar í efstu deild ítalska boltans og úr varð gríðarlega fjörugur slagur, þar sem sex mörk og rautt spjald litu dagsins ljós.

Staðan var markalaus allt þar til undir lok fyrri hálfleiks, þegar Matteo Pessina kom Monza yfir með marki úr vítaspyrnu. Sex mínútum síðar, í uppbótartíma fyrri hálfleiks, tvöfaldaði Dany Mota forystuna fyrir heimamenn sem leiddu 2-0 í hálfleik.

Monza hefur ekki verið lengi í efstu deild ítalska boltans og hafði tapað þremur leikjum af þremur gegn Milan fyrir viðureignina í dag, en leikmenn liðsins öðluðust aukna trú um að geta breytt sögunni þegar Luka Jovic var rekinn af velli fyrir að löðrunga andstæðing í upphafi síðari hálfleiks.

Tíu leikmenn Milan skiptu um gír eftir rauða spjaldið og sýndu flotta takta, þar sem varamennirnir Christian Pulisic og Olivier Giroud voru drifkrafturinn á bakvið frábæra endurkomu í síðari hálfleik.

Pulisic lagði upp fyrir Giroud og skoraði svo glæsilegt mark sjálfur til að jafna leikinn á 88. mínútu.

Heimamenn í Monza sættu sig ekki við þetta og tókst þeim að skora tvö mörk á dramatískum lokamínútum til að útkljá viðureignina og tryggja sér sögulegan sigur á nágrönnum sínum frá Mílanó.

Monza er átta stigum frá Evrópubaráttunni eftir þennan sigur, á meðan Milan er áfram í þriðja sæti - ellefu stigum á eftir toppliði Inter sem á leik til góða í þokkabót.