Moyes svekktur - Vildi fá vítaspyrnu og rangstöðu

Staðan var 1-1 eftir nokkuð jafnan fyrri hálfleik og stálu heimamenn í Arsenal sigrinum undir lokin eftir að Hamrarnir höfðu verið betri stærstan hluta síðari hálfleiks.

Moyes var ósáttur með dómgæsluna þar sem hann vildi fá vítaspyrnu þegar boltinn fór í handlegg Gabriel Magalhaes innan vítateig Arsenal.

„Mér fannst þetta vera vítaspyrna. Ef þetta var ekki víti þá verða þeir að útskýra þessar reglur betur fyrir okkur. Það ríkir alltof mikil óvissa. Hann ætlaði að skalla en hitti ekki boltann svo hann fór í handlegginn, honum á að vera refsað fyrir það," sagði Moyes að leikslokum og fór svo að tala um mörkin sem Arsenal skoraði.

„Mörkin hefðu getað verið dæmd af vegna rangstöðu. Við sýndum góða frammistöðu og allir sem horfðu á leikinn sáu hversu óheppnir við vorum að taka ekki öll stigin."

West Ham er án stiga eftir tvær umferðir á meðan Arsenal er með sex stig.