Arteta: Þurfum að skipta um gír fyrir næstu leiktíð

Arsenal endaði í öðru sæti þrátt fyrir að hafa átt magnað tímabil og krækt sér í 89 stig.

„Ég er mjög stoltur. Við gáfum allt í þetta, það var hægt að skynja hversu mikið við þráðum titilinn. Við reyndum okkar besta en því miður dugði það ekki til. Ég verð að óska Manchester City til hamingju, þeir eru meistararnir. Þeir hafa verið ótrúlegir síðan í desember," sagði Arteta eftir leikinn.

„Það er ömurlegt að vinna ekki titilinn en framtíðin er björt, við bættum næstum öll met sem þetta félag hefur nokkurn tímann sett. Þetta er erfiðasta deild í sögunni og við verðum að bæta okkur enn frekar. Við þurfum að finna leiðir til að bæta leik okkar."

Arteta er dáður af stuðningsfólki Arsenal enda hafði félaginu gengið illa í langan tíma áður en hann var ráðinn.

„Það besta við þetta allt saman er að hafa tekist að tengja stuðningsfólkið aftur við liðið, við erum búnir að taka þetta á næsta stig. Þetta er einn af draumunum sem ég átti mér þegar ég tók við félaginu. Ég er sorgmæddur því mig langaði að vinna titil í dag og sá titill hefði verið tileinkaður stuðningsmönnum.

„Við þurfum að vera ákveðnari, hugrakkari og metnaðarfyllri ef við viljum vinna deildina á næstu leiktíð. Við þurfum að skipta um gír."