Southampton tók á móti Bournemouth í fyrsta leik helgarinnar í ensku úrvalsdeildinni.

Nathan Ake kom gestunum yfir með skalla eftir hornspyrnu og tvöfaldaði Harry Wilson forystuna fyrir leikhlé.

Wilson hafði skorað nokkru áður en markið dæmt af, með notkun myndbandsdómgæslu, vegna rangstöðu.

James Ward-Prowse minnkaði muninn með marki úr vítaspyrnu í síðari hálfleik og sóttu heimamenn stíft en varnarmúr Bournemouth hélt út.

Það var alveg í lokin sem gestirnir náðu að innsigla sigurinn með skrautlegu marki. Langur bolti barst fram frá markverðinum og var einhver misskilningur á milli Angus Gunn, í marki Southampton, og Jannik Vestergaard.

Þeir rákust á hvorn annan og misstu af boltanum. Callum Wilson þakkaði fyrir sig og skoraði í autt mark.

Bournemouth er komið upp í tíu stig með sigrinum. Southampton er með sjö stig.