Það bendir allt til þess að það verði sett heimsmet í áhorfendafjölda á kvennaleik í fótbolta þegar erkifjendurnir Barcelona og Real Madrid mætast í átta-liða úrslitum Meistaradeildarinnar.
Leikurinn, sem verður seinni leikurinn í einvíginu, mun fara fram á hinum magnaða leikvangi, Camp Nou í Barcelona.
Barcelona segir að 85 þúsund miðar hafi selst á leikinn á þremur dögum. Það er meiri fjöldi en mætir að meðaltali á leiki hjá karlaliði Börsunga.
Heimsmetið í áhorfendafjölda á kvennaleik var sett á Spáni árið 2019 þegar Barcelona spilaði við Atletico Madrid. Það mættu 60,739 á þann leik.
Það er ljóst að það er gríðarlegur áhugi á þessum leik og þessu einvígi. Barcelona er ríkjandi Evrópumeistari og er mun sigurstranglegri.
Þess má geta að Real Madrid var með Breiðabliki í riðli í Meistaradeildinni; Frá Kópavogsvelli á Camp Nou.
Athugasemdir