England: Stefán Teitur í sigurliði - Jón Daði hjálpaði Burton úr botnsætinu

Leikið var í neðri deildum Englands í kvöld. Sheffield United tyllti sér á topp Championship-deildarinnar með sigri gegn tíu mönnum Swansea.

Sunderland fór upp í þriðja sæti með því að vinna Derby, West Brom tapaði í endurkomuleik Tony Mowbray og Blackburn tapaði heima gegn Coventry. Arnór Sigurðsson er enn á meiðslalista Blackburn en er byrjaður að æfa. Hann hefur ekki spilað síðan í lok október en Blackburn er í sjötta sæti.

Stefán Teitur Þórðarson lék 90 mínútur fyrir Preston sem vann Watford. Stefán fékk gult spjald í leiknum. Preston er í sextánda sæti.

QPR vann Hull, Cardiff jafnaði gegn Millwall í lokin og vandræði Luton halda áfram en Oxford kom tvisvar til baka.

Í C-deildinni, League One, vann Charlton sigur gegn Bolton í lokin og Jón Daði Böðvarsson skoraði í fyrsta byrjunarliðsleik sínum fyrir Burton sem vann Wigan og komst upp úr neðsta sætinu. Jón Daði jafnaði leikinn í 1-1 en Burton vann 2-1 sigur.