England: Þriggja marka sigrar hjá bæði Man Utd og Wolves

Staðan var markalaus á Old Trafford þar til á 42. mínútu en þá skoraði Bruno Fernandes úr vítaspyrnu sem hann vann sjálfur eftir að Ben Foster felldi hann í teignum. Fyrsta mark Portúgalans fyrir Rauðu djöflanna.

Í stöðunni 1-0 fyrir heimamönnum komu gestirnir í Watford boltanum í netið, þar var að verki Troy Deeney en VAR dæmdi hins vegar markið af vegna þess að boltinn hafði farið í höndina á leikmanni Watford í aðdragandanum.

Anthony Martial skoraði annað mark heimamanna á 58. mínútu, hann afgreiddi boltann þá snyrtilega í markið. Það var svo Mason Greenwood sem skoraði þriðja mark Manchester United og stigin þrjú í höfn.

Manchester United er nú í 5. sæti með 41 stig, þremur stigum á eftir Chelsea sem er í 4. sæti. Watford er í 19. sæti með 24 stig.

Manchester Utd 3 - 0 Watford
1-0 Bruno Fernandes ('42 , víti)
2-0 Anthony Martial ('58)
3-0 Mason Greenwood ('75)

Lokatölurnar í Wolverhampton voru þær sömu og í Manchester, 3-0 fyrir heimamönnum.

Diogo Jota fylgdi eftir góðum leik í Evrópudeildinni í vikunni þar sem hann skoraði þrjú mörk og skoraði tvö mörk í dag. Mörkin skoraði hann með ellefu mínútna millibili í fyrri hálfleik.

Í upphafi seinni hálfleiks bætti Raul Jimenez við þriðja marki heimamanna.

Úlfarnir eru í 8. sæti með 39 stig en Norwich hins vegar í mjög slæmum málum á botni deildarinnar.

Wolves 3 - 0 Norwich
1-0 Diogo Jota ('19 )
2-0 Diogo Jota ('30 )
3-0 Raul Jimenez ('50 )