KR vann langþráðan sigur þegar liðið fékk Aftureldingu í heimsókn í botnbaráttu Bestu deildarinnar í kvöld.
Lestu um leikinn: KR 1 - 0 Afturelding
Staðan var markalaus allt þar til á 87. mínútu þegar Marcella Marie Barberic setti boltann í netið fyrir KR, sem er aðeins komið með þrjú stig eftir sex umferðir.
„Við þurftum á þessum sigri að halda, bæði uppá andlegu hliðina og stigasöfnun í deildinni. Við náðum að halda góðum fókus í dag og mættum í þennan leik til að berjast fyrir lífi okkar," svaraði Rebekka þegar hún var spurð hvað skóp sigurinn.
Það eru þjálfaraskipti hjá KR þar sem Jóhannes Karl Sigursteinsson er hættur eftir 9-1 tap í síðustu umferð.
„Við viljum þakka Kalla kærlega fyrir allt sitt starf og hann náttúrulega undirbjó þennan leik með Arnari líka. Við bjuggumst ekki við þessu en við náðum að fókusa á leikinn og þetta hafði ekki áhrif á okkur þannig."
Rebekka talaði að lokum stuttlega um þá leikmenn sem eru að koma til KR frá útlöndum. Nokkrar eru að koma úr bandaríska háskólaboltanum á meðan aðrar eru nýjar í Vesturbæ og komnar á fullt skrið á æfingum með liðinu.