Emery hefur trú á fjórða sætinu

Unai Emery stjóri Arsenal var svekktur að leikslokum en sagði að Meistaradeildarbaráttan sé hvergi nærri búin. Enn eru þrír leikir eftir af tímabilinu og er sá næsti hjá Arsenal afar erfiður, á útivelli gegn Leicester.

„Við vissum að þetta yrði erfiður leikur. Wolves er með mjög sterkt lið varnarlega og snögga sóknarmenn sem er erfitt að eiga við," sagði Emery.

„Við spiluðum vel fyrstu 25 mínúturnar en náðum ekki að skapa mörg færi. Svo hrundi þetta og í hálfleik ákváðum við að byrja nýjan leik eftir leikhlé.

„Úrvalsdeildin snýst um að spila vel yfir 38 leikja tímabil. Í dag erum við vonsviknir en við megum ekki gleyma hvernig staðan var fyrir þremur mánuðum. Við verðum að finna jákvæðnina og ná í Meistaradeildarsæti."