„Viðbrögðin eru virkilega blendin. Þar sem við lendum tvisvar undir og komum tvisvar til baka er ég sáttur með stigið. Hins vegar ætluðum við okkur þrjú stig í þessum leik. Það hefur verið niðursveifla, þrír tapleikir í röð, og við ætluðum okkur sigur. Svona er boltinn og svo fór sem fór," sagði Andri Hjörvar Albertsson, þjálfari Þór/KA, eftir jafntefli við Fylki.
Lestu um leikinn: Þór/KA 2 - 2 Fylkir
Fylkir komst yfir í tvígang í leiknum en fram að fyrsta marki leiksins hafði Þór/KA verið sterkara aðilinn án þess þó að skapa mörg marktækifæri. Hefur það mikil áhrif á leikmenn Þór/KA að finna að það þurfi að bæta í sóknarleikinn þegar þær lenda undir?
„Það gæti verið og sýndi sig í dag að þær fóru allar upp með kassann um leið og við fengum mark á okkur. Stigu upp og svöruðu í bæði skiptin mjög fljótt fyrir mörkin sem þær fengu á sig. Við eigum að vera þannig lið sem vill stýra leiknum og bæta í og bæta í og bæta í."
Andri var einnig spurður út í vítaspyrnu Fylkis og hvort hann hefði íhugað að gera fleiri breytingar á liði sínu með skiptingum. Viðtalið í heild sinni má sjá hér að ofan.
Athugasemdir