ÍA vann leikinn 2-1 og var þetta fyrsti sigur Sindra Snæs í sumar. Hann var ónotaður varamaður þegar ÍBV lagði ÍA að velli 3-2 fyrr í sumar.

„Ég er fyrst og fremst ánægður með þrjú frábær stig. Að þeir skuli falla er bara eitthvað sem gerðist hjá ÍBV í sumar," sagði Sindri.

„Þetta eru allt vinir mínir svo auðvitað er sorglegt að sjá frábæran klúbb falla. Ég vona að þeir komi strax upp aftur.

„Það er ógeðslega gaman að vinna. Ég vann einmitt ÍA einu sinni í sumar þegar ég var á bekknum og fékk að syngja þá á móti ÍA. Núna fæ ég að syngja á móti ÍBV þannig ég er bara mjög ánægður. Sólin skín og þá er gaman að brosa."

Sindri segist vera ánægður á Skaganum og spenntur fyrir framtíðinni. Hann hefur áður leikið fyrir ÍR, Breiðablik, Selfoss og Keflavík.