Klopp mjög ánægður með sóknarleikinn

Hamrarnir sýndu fína kafla í leiknum en Liverpool var sterkari aðilinn á vellinum og verðskuldaði sigurinn. Klopp er mjög sáttur með lærisveina sína.

„Við spiluðum mjög vel á köflum gegn virkilega erfiðum andstæðingum sem búa yfir nægum gæðum til að geta keppt við sterkustu liðin. Ég er mjög ánægður með frammistöðuna og mörkin sem við skoruðum, þetta voru frábær mörk," sagði Klopp.

„Við áttum góða kafla en við vorum aldrei við stjórn eins og við vildum. Það er augljóst að við gerðum einhver mistök en heilt yfir var þetta flott frammistaða. Við sköpuðum mikil vandræði fyrir þá með sóknarleiknum okkar og skoruðum magnað mark."

Klopp hrósaði að lokum Alisson Becker fyrir magnaða markvörslu í fyrri hálfleik og Darwin Nunez fyrir að skora glæsimark í þeim síðari.

Liverpool er í öðru sæti ensku úrvalsdeildarinnar með 16 stig eftir 6 umferðir, tveimur stigum eftir toppliði Manchester City sem er með fullt hús stiga.