Spánn: Valencia sigraði Barcelona

Það tók ekki langan tíma fyrir Quique Setien að tapa sínum fyrsta leik við stjórnvölinn hjá Barcelona. Það tap kom í dag, á útivelli gegn Valencia.

Börsungar héldu boltanum vel innan liðsins en náðu ekki að skapa sér mikið. Heimamenn í Valencia vörðust vel og voru beittir sóknarlega.

Maxi Gomez var næstum búinn að koma Valencia yfir í fyrri hálfleik en Marc-Andre ter Stegen varði vítaspyrnu frá honum. Gerard Pique gerðist brotlegur innan teigs eftir misheppnaða tæklingu.

Heimamenn komust yfir í upphafi síðari hálfleiks þegar skot Maxi Gomez fór af Jordi Alba og í netið.

Börsungar reyndu að jafna en á 77. mínútu innsiglaði Gomez sigurinn með marki eftir skyndisókn.

Barca er á toppi spænsku deildarinnar með 43 stig eftir 21 umferð. Liðið getur misst toppsætið til Real Madrid á morgun.

Valencia er í fimmta sæti með 34 stig, einu stigi frá Meistaradeildarsæti.

Espanyol 1 - 1 Athletic Bilbao
0-1 Asier Villalibre ('12)
1-1 Raul de Tomas ('63)

Botnlið Espanyol fékk þá Athletic Bilbao í heimsókn fyrr í dag.

Gestirnir komust yfir eftir vel útfærða hornspyrnu í fyrri hálfleik en Raul de Tomas gerði jöfnunarmark Espanyol eftir leikhlé.

Þetta var fimmta jafntefli Bilbao í röð í deildinni og er liðið tveimur stigum frá Evrópusæti.

Espanyol reif sig af botninum en er þremur stigum frá öruggu sæti.