Spánn: David Silva í lykilhlutverki er Sociedad fór á toppinn

Real Sociedad er búið að endurheimta toppsæti spænsku deildarinnar eftir sannfærandi sigur á Huesca í kvöld. Þetta var þriðji sigur Sociedad í röð og er liðið einu stigi fyrir ofan Real Madrid og Granada sem eiga þó leik til góða.

Fyrirliðinn Mikel Oyarzabal skoraði eina mark fyrri hálfleiksins örugglega af vítapunktinum eftir að dæmd var hendi innan vítateigs.

Rafa Mir jafnaði í upphafi síðari hálfleiks með frábærum skalla en átta mínútum síðar var Oyarzabal mættur aftur. Í þetta sinn stangaði hann knöttinn í netið og gaf sínum mönnum forystuna.

Sociedad var við stjórn á þessum tímapunkti og bætti Portu þriðja markinu við eftir frábæran undirbúning frá David Silva sem smeygði sér framhjá tveimur andstæðingum áður en hann gaf boltann. Skömmu síðar innsiglaði sænski sóknarmaðurinn Alexander Isak sigurinn eftir frábæra langa sendingu frá Silva.