England: Bowen afgreiddi Brentford með þrennu

West Ham og Brentford áttust við í eina leik kvöldsins í ensku úrvalsdeildinni, áhugaverðum Lundúnaslag sem fór fram á London Stadium.

Leikurinn fór afar fjörlega af stað þar sem Jarrod Bowen var búinn að koma heimamönnum í tveggja marka forystu eftir sjö mínútna leik.

Neal Maupay svaraði með marki fyrir Brentford skömmu síðar en hvorugu liði tókst að bæta marki við leikinn fyrir leikhlé. Hamrarnir voru sterkari aðilinn fram að leikhlé, en síðari hálfleikurinn var jafnari.

Færanýting West Ham var þó betri heldur en hjá Brentford, þar sem Bowen fullkomnaði þrennuna sína eftir leikhlé og tvöfaldaði þannig forystuna á ný.

Sex mínútum síðar bætti Emerson Palmieri glæsilegu marki við leikinn til að koma heimamönnum í 4-1. Brentford mistókst að hreinsa boltann almennilega frá marki og barst hann til Emerson, sem lét vaða utan teigs og uppskar fallegt mark.

Gestirnir í liði Brentford voru ekki á því að gefast upp og skiptu þeir um gír á lokakaflanum. Yoane Wissa tókst að minnka muninn á 82. mínútu og komst Ivan Toney afar nálægt því að skora en boltinn rataði ekki í netið.

Lokatölur urðu því 4-2 fyrir West Ham, sem er búið að jafna Brighton á stigum í baráttunni um Evrópusæti.

Brentford var að tapa þriðja deildarleiknum í röð og er fimm stigum frá fallsæti.

Þetta var langþráður sigur hjá West Ham og sá fyrsti á nýju ári, eftir fjóra tapleiki og fjögur jafntefli í átta leikjum á árinu.