England: Umdeild vítaspyrna tryggði Everton þriðja sigurinn í röð

Crystal Palace tók á móti Everton í ensku úrvalsdeildinni í dag og úr varð hörkuleikur. Gylfi Þór Sigurðsson spilaði síðasta stundarfjórðunginn í liði Everton, hann kom inn á miðjuna fyrir Andre Gomes á 76. mínútu.

Dominic Calvert-Lewin er funheitur á upphafi tímabils og kom hann gestunum yfir snemma leiks eftir sendingu frá Seamus Coleman. Cheickhou Kouyate jafnaði stundarfjórðungi síðar með skalla eftir hornspyrnu.

Everton var betri aðilinn í fyrri hálfleik og fékk afar umdeilda og í raun frekar fáránlega vítaspyrnu þegar skalli Lucas Digne fór í hendi Joel Ward innan teigs. Skalli Digne var á leið til Richarlison sem var í rangstöðu þegar sendingin fór af stað. Richarlison steig á vítapunktinn og skoraði örugglega.

Hvorugu liði tókst að skora í síðari hálfleik þrátt fyrir hálffæri á báða bóga og niðurstaðan sanngjarn sigur Everton, sem er með fullt hús stiga eftir þrjár umferðir. Crystal Palace er með sex stig.