Torino og Atalanta áttust við í fyrsta leik helgarinnar á Ítalíu og úr varð mikil skemmtun eins og gerist oft þegar Atalanta á í hlut.

Heimamenn í Torino komust yfir snemma leiks með marki frá Andrea Belotti en Alejandro 'Papu' Gomez jafnaði tveimur mínútum síðar.

Skömmu síðar gaf Papu Gomez frábæra sendingu innfyrir á Luis Muriel sem kom gestunum yfir.

Gomez lagði þriðja mark Atalanta einnig upp með góðri fyrirgjöf sem rataði á Hans Hateboer en Belotti minnkaði muninn tæpri mínútu síðar með sínu öðru marki.

Staðan var því 2-3 í leikhlé og gerði Marten de Roon fjórða mark Atalanta snemma í síðari hálfleik.

Atalanta var betri aðilinn í seinni hálfleik og verðskuldaði sigurinn.