Ætlar ekki að breyta leikstílnum í úrvalsdeildinni

Russell Martin, stjóri Southampton, segir að leikmenn sínir þurfi að takast á við þá áskorun að spila „hans leikstíl“ í ensku úrvalsdeildinni á næsta tímabili.

Martin segist ekki ætla að breyta leikstílnum þrátt fyrir að Southampton, sem vann Leeds á Wembley í gær, sé komið upp í deild þeirra bestu.

Southampton fór rólega af stað í Championship-deildinni á þessu tímabili og leikstíll Martin fékk nokkra gagnrýni. Hann leggur mikla áherslu á að lið sitt haldi vel í boltann og skori hátt í „possession“.

Eftir því sem á tímabilið leið þá fann Southampton sig betur í þessum leikstíl og fór í gegnum 25 leiki án þess að bíða ósigur. Martin stýrir í fyrsta sinn í ensku úrvalsdeildinni og margir efast um að leikstíllinn geti skilað Southampton velgengni í efstu deild.