Ítalía: Inter kom til baka gegn Parma

Parma tók á móti Inter í síðasta leik 28. umferðar ítölsku deildarinnar og skoraði Gervinho fyrsta mark leiksins eftir stundarfjórðung.

Hann lék þá á varnarmann Inter og skoraði laglegt mark eftir stórkostlega sendingu frá Juraj Kucka.

Inter náði ekki að jafna í fyrri hálfleik en lærisveinar Antonio Conte tóku stjórn á leiknum í seinni hálfleik.

Skyndisóknir Parma voru þó stórhættulegar og gestirnir frá Mílanó sluppu nokkrum sinnum með skrekkinn bæði fyrir og eftir leikhlé.

Jöfnunarmarkið kom ekki fyrr en á 84. mínútu þegar Stefan de Vrij skoraði með skalla eftir hornspyrnu. Í kjölfarið átti Kucka orðaskipti við dómarann og fékk beint rautt spjald.

Tveimur mínútum síðar átti Victor Moses fyrirgjöf sem rataði á kollinn á varnarmanninum efnilega Alessandro Bastoni sem skoraði úr auðveldu færi.

Inter verðskuldaði sigurinn og er í þriðja sæti, átta stigum eftir toppliði Juventus þegar tíu umferðir eru eftir.