Lærisveinar Gennaro Gattuso í Napoli eru á góðu skriði og voru að vinna sinn þriðja deildarleik í röð.

Í kvöld fékk liðið heimsókn frá Torino og skoraði gríski miðvörðurinn Kostas Manolas fyrsta mark leiksins með skalla eftir aukaspyrnu Lorenzo Insigne.

Napoli stjórnaði gangi mála nánast allan leikinn og tvöfaldaði Giovanni Di Lorenzo forystuna eftir fyrirgjöf frá Dries Mertens á 82. mínútu.

Gestirnir lifnuðu við undir lokin og náði Simone Edera að minnka muninn í uppbótartíma. Nær komust gestirnir þó ekki og verðskuldaður sigur Napoli staðreynd.

Napoli er í sjötta sæti deildarinnar, aðeins sex stigum frá Meistaradeildarsæti.

Þetta var sjötti tapleikur Torino í röð og er liðið aðeins fimm stigum fyrir ofan fallsvæðið.