Championship: Tvö rauð er Sheffield United fór á toppinn - Fyrsta mark Davies í meira en þrjú ár

Sheffield United kom sér á toppinn í ensku B-deildinni í kvöld með því að vinna Sunderland, 1-0, í dramatískum leik á Bramall Lane.

Bæði lið hafa verið að slást um toppsætin í deildinni á þessari leiktíð en aðeins tvö stig voru á milli þeirra fyrir leikinn.

Patrick Roberts, leikmaður Sunderland, gat komið gestunum í forystu á 29. mínútu er liðið fékk vítaspyrnu en Michael Cooper, markvörður Sheffield United, varði spyrnuna.

Rúmum tíu mínútum síðar fékk Chris Mepham, varnarmaður Sunderland að líta rauða spjaldið, er hann braut á Tyrese Campbell sem var að sleppa í gegn. Nokkrum mínútum síðar var jafnt í liðum er Harry Souttar fékk sitt annað gula spjald fyrir að toga í Wilson Isidor.

Fjörugur fyrri hálfleikur en það vantaði aðeins upp á það í þeim síðari.

Áhorfendur fengu að minnsta kosti eitt mark og kom það úr óvæntri átt en varamaðurinn Tom Davies gerði það þegar sjö mínútur voru eftir. Fyrsta mark hans í meira en þrjú ár!

Góður sigur hjá Sheffield United sem er komið á toppinn með 38 stig en Sunderland í 4. sæti með 33 stig eftir átján leiki.