Sancho var einn af bestu mönnum Dortmund í 1-0 sigrinum á Paris Saint-Germain.

Eftir leikinn voru þeir Peter Schmeichel og Jamie Carragher á Signal Iduna Park að ræða um leikinn. Carragher hafði þá verið með stuðningsmönnum Dortmund og drukkið átta bjóra.

Hann var því ágætlega vel kenndur þegar hann kallaði á Sancho og bað hann um að koma í viðtal.

Carragher var heldur léttur og talaði af ástríðu um „Gula vegginn“, stuðningsmenn Dortmund, á meðan hann þreifaði á öxlum Sancho.

Micah Richards, Thierry Henry, Kate Abdo og Alessandro Del Piero gátu varla haldið hlátrinum inni á meðan þau fylgdust með Carragher í viðtalinu.

„Hann er kominn í skammarkrókinn,“ sagði Schmeichel stuttu síðar, en það var fjarri sannleikanum, því Carragher mætti aftur í mynd stuttu síðar í góðum gír.