„Dalvík/Reynir er ekki flugeldasýningalið en þeir kunna þetta og vita hvað þeir þurfa að gera. Þeir skila því sem þarf í hvern og einn leik. Dragan stendur fastur á sínu og það kemst enginn upp með neitt kjaftæði, hann er með þennan serbneska aga og leggur leikina upp eins og hentar hverju sinni," segir Baldvin.

Fyrir tímabilið fékk Dalvík/Reynir til sín Áka Sölvason að nýju en hann lék með Völsungi á síðasta tímabili. Baldvin segir að það hafi verið lykilatriði í árangri liðsins.

„Áki er tengdasonur formannsins. Það var guðsgjöf fyrir Dalvík/Reyni því hann er geggjaður leikmaður í þessa deild og hefur raðað inn mörkum og stoðsendingum. Dalvík strögglaði í byrjun móts þegar hann var meiddur en liðið hefur verið á skriði síðan hann kom til baka."

Baldvin talar um að Dalvík/Reynir hafi komið sér bakdyramegin inn í toppbaráttuna en í þættinum var einnig rætt um aðstöðuna á Dalvík og burði liðsins til að gera gott mót í Lengjudeildinni á næsta tímabili.