Stuðningsmannalag Man Utd, "Glory glory Man Utd", er einfaldara en Gamli Nói, enda ekki leggjandi á þeirra greind að læra flóknara lag. Lag þeirra er til með íslenskum texta og sungið af krökkum landsins þegar farið er í keppnisferðir, „Áfram áfram áfram bílstjóri“.

Engir aðdáendur hafa dáðst meira af útliti eigin leikmanna og stuðningsmenn Man Utd. Allt það ævintýri hófst þegar David Beckham var helsta stjarna liðsins. Í framhaldinu héldu þeir ekki vatni yfir Cristiano Ronaldo. Það sem merkilegt er að þessi útlitsdýrkun er enn við líði þótt helsta stjarna liðsins í dag sé Wayne Rooney. „Hrikalega er Wayne Rooney flottur maður!“ HH, 2007 – dagsins í dag.

Þegar nýr leikmaður er kynntur til sögunnar hjá Man Utd byrja stuðningsmenn liðsins að segja að viðkomandi verði næsti þessi og næsti hinn. Dæmi um þetta er t.d. að Philip Mulryne átti að verða næsti Beckham, Obertan næsti C. Ronaldo, Liam Miller næsti Roy Keane, Johnny Evans næsti Ferdinand, Alan Smith næsti Cantona o.s.frv. o.s.frv.

Þegar að er gáð eru fá lið með jafn marga dýra leikmenn og Man Utd. Það er hins vegar afar viðkvæmt fyrir Utd aðdáendur þegar bent er á hvað hinir og þessir kostuðu. Þá tala þeir alltaf um að Giggs og Scholes séu uppaldir hjá félaginu. Aðrir aðdáendur kveikja samt á því að það gerir menn eins og Ferdinand, Berbatov, Rooney, Carrick og Nani ekki ódýrari fyrir vikið.

Fótboltahroki er hvergi algengari en á meðal Man Utd aðdáenda. Það er því til einföld lausn við því vandamáli: Ekki ræða við Man Utd aðdáendur um fótbolta. Til hvers að berja hausnum við stein?

Gríðarlegur fjöldi fólks svarar spurningunni „Með hvaða liði heldur þú í enska?“ með þessum hætti; „Æjj ég fylgist nú eiginlega ekkert með fótbolta, en ég held með Man Utd“.

Hvernig væri nú að fylgjast aðeins með og velja sér lið, en ekki láta velja fyrir þig?