Við fengum að sjá skemmtileg lið berjast um sigur frá fyrstu mínútu, mörg mögnuð atvik, helst til mörg brot, sem mörg beindust að Jóa Kalla, en á móti fannst mér að leikmenn ÍA ofléku stundum, þegar sótt var að þeim.

Þau tvö atriði, sem stóðu þó upp úr í leiknum, voru snilldarmark Jóa Kalla og síðan klaufaleg vörn og markvarsla í 3ja marki ÍA. Leyfi ég mér að láta þá skoðun í ljós, að það séu eingöngu örfáir knattspyrnumenn í heiminum, sem hafa þessa sparktækni, sem Jói Kalli hefur og tel ég hann vera í flokki, að þessu leiti með Ronaldo og Beckham.

Nú segir einhver, er karlinn orðinn gleyminn að minnast ekki á besta knattspyrnumann heims, hann Messi? Nei ég gleymi honum ekki, en hann hefur öðru vísi tækni, í sínum spyrnum, gerir meira að því að taka snúningsbolta yfir vörnina og þaðan skrúfast hann í hornin.

Í þriðja marki ÍA, sjáum við aftur hvað það hefur mikið að segja þegar sóknarmenn, þeir “Martinbræður” sýna áræði og kraft, þó svo að markið komi fyrst og fremst vegna mistaka varnar og markmanns KR.

Öll hin mörkin voru fín og fannst mér t.d. markið hjá Þorsteini í byrjun alveg magnað og er ekki sammála þeim sem telja að ungu mennirnir sem komu til KR núna fyrir tímabilið, það eru m.a. fyrrgreindur Þorsteinn og Haukur Heiðar, munu ekki styrkja KR liðið heilmikið. Í því sambandi má geta þess að Haukur hefur verið einn sá besti í báðum leikjum í deildinni.

Vonandi fáum við að sjá fleiri svona skemmtilega leiki með flottum tilþrifum en vitaskuld mistökum, bæði leikmanna og dómara, sem alltaf fylgir og gerir leikina enn skemmtilegri, sérstklega fyrir þá sem ekki eru áhangendur þeirra liða sem gera mistökin.

Mig langar að hæla Stöð 2 fyrir útsendinguna, þetta er orðið miklu fagmannlegra, en áður. Einnig voru Pepsi mörkin mjög vel heppnuð hjá Herði og félögum, þó svo að “alviturinn” mætti temja sér a.m.k. einu sinni í þættinum, að sleggjudómar um allt og alla, eiga ekki alltaf við.

Að allra síðustu þetta. Þar sem ég hef hælt Stöð 2 fyrir hversu vel þeir hafa staðið sig í sambandi við úrvalsdeildina, vil ég mælast til að þeir sinni að eihverju leiti einnig neðri deildunum.

Einnig fannst mér mjög sérstakt hvað þeir féllu gjörsamlega á prófinu, þegar HK rúllaði upp úrslitakeppninni í handbolta í fyrsta sinn. Held ég að ég fari rétt með þegar ég tel þá eingöngu hafa fjallað um þetta í ca. 2 mínutur. Var þetta þó eitt það óvæntasta og magnaðasta sem gerðist í íþróttum landans, núna síðustu daga og það sem meira var, fullkomlega sanngjarnt.

Með kveðjum að norðan,
Stebbi Gull.