Stelpurnar sem spila í Pepsídeildinni eiga skilið að fá áhorfendur. Þær spila virkilega skemmtilegan fótbolta. Þær eru vel þjálfaðar. Þær leggja mikið á sig fyrir sína íþrótt. Þegar ég byrjaði að spila með Val, vel fyrir aldarmót, þá var ekki einu sinni til 3. flokkur kvenna. Við æfðum vel en ekkert á við það sem stelpurnar æfa í dag.

Á stuttum tíma hafa gæði fótboltans aukist svo um munar. Við eigum virkilega góðar knattspyrnukonur. Þær eru fitt, flottar og góðar í fótbolta. Þær eru þær flottustu í Evrópu. Það sér maður þegar út er komið en ég hef leikið í Bandaríkjunum, Englandi og Belgíu og farið á mörg mót með unglingalandsliðum Íslands.

Hér er metnaðurinn, hér er viljinn. Stelpurnar láta engan segja sér hvað þær geta og geta ekki gert. Íslenskar fótboltakonur eru sjálfsöruggar, með mikið sjálfstraust og ætla sér langt.

Það er nánast skylda þeirra foreldra sem eiga stúlkur í fótbolta að mæta á völlinn. Sýnum dætrum þessa lands góðar fyrirmyndir. Hættum gömlu mýtunni um að stelpur í fótbolta fái skakkar lappir.

Lítum á stelpurnar í Pepsídeildinni í dag. Afburðaríþróttamenn, oftast framúrskarandi í öðru því sem þær taka sér fyrir hendur því þær vita hvað það er að leggja eitthvað á sig til að ná árangri í íþróttum og í lífinu sjálfu.

Á skömmum tíma hefur Pepsídeildin orðið sterkari. Leikmenn eru leiknari, sterkari og með mun betri leikskilning en áður. Þjálfararnir eru betri og stelpurnar í yngri flokkum eru betri. Þetta skilar okkur ekki bara betri Pepsídeild, heldur einnig betra A-landsliði og unglingalandsliðum sem eru með þeim fremstu í Evrópu.

Að horfa á leik í Pepsídeild kvenna er góð skemmtun, virkilega góð. Allir á völlinn í sumar. Styðjum stelpurnar okkar í Pepsídeild kvenna.

- Íris Björk Eysteinsdóttir
Meðlimur í unglinganefnd kvenna KSÍ
Meðlimur í Félagi áhugafólks um kvennaknattspyrnu
Þjálfari yngri flokka Breiðabliks
Fyrrum leikmaður og þjálfari í efstu deild kvenna
Eldheitur stuðningsmaður leikmanna í Pepsídeild kvenna