Sigurður Ragnar Eyjólfsson.
,,Við söknum Söru mikið. Hún er orðin mjög mikilvægur hluti af liðinu.''
,,Við vorum að vonast til að varnarleikurinn myndi vera sterkari en nú höfum við aðeins verið að fá á okkur mörk á annan hátt en áður.''
,,Það er mjög fínt að fá þetta mót þar sem reynir virkilega á liðið svo við getum unnið með þá þætti sem þarf að bæta.''
,,Þetta var svekkjandi," sagði Sigurður Ragnar Eyjólfsson landsliðsþjálfari Íslands í samtali við Fótbolta.net eftir 1-2 tap gegn Kína í leiknum um fimmta sætið á Algarve Cup í dag.
,,Mér fannst við spila leikinn ágætlega að mörgu leiti. Þetta var mun betri leikur hjá okkur en gegn Dönum og mér fannst við óheppnar að tapa þessum leik," hélt hann áfram. ,,Jafntefli hefði verið sanngjörn úrslit, og við hefðum alveg eins getað unnið leikinn, þær kínversku sköpuðu sér engin fleiri færi. Í heildina séð var margt ágætt í leiknum en úrslitin ekki eins og við hefðum kosið."
Virkuðu þreyttar í síðustu tveimur leikjum
Íslenska liðið mætti Kína á sama móti fyrir tveimur árum og vann þá leikinn 4-1. Kínverska liðið þótti ekki sterkara en þá en þýðir það að íslenska liðið sé orðið síðra en fyrir tveimur árum?
,,Nei, það finnst mér alls ekki," svaraði Sigurður Ragnar. ,,Munurinn er kannski sá að núna erum við búnar að fara í gegnum miklu erfiðari leiki og liðið er hálflemstrað og töluverð meiðsli. Þær virkuðu þreyttar í síðustu tveimur leikjunum, þær eru ekki vanar að spila marga leiki með stuttu millibili á móti svona góðum liðum þar sem er svona mikið tempó."
,,Þær hafa verið að tala um að þær eru þreyttari núna og leikirnir erfiðari. Þegar við mættum Kína fyrir tveimur árum þá vorum við búin að eiga þrjá léttari leiki og mættum svo Kína og toppuðum á mótinu. Núna vorum við hálflemstraðar þegar við komum í leikinn sjálfan."
Einstaka leikmenn gætu verið í betra formi
Þó mátti sjá á sumum leikmönnum íslenska liðsins á mótinu að þeir eru ekki í sínu besta formi. Sigurður Ragnar staðfesti það en sagði að meiðsli sterkra leikmanna hafi líka spilað inní.
,,Einstaka leikmenn gætu verið í betri formi en sumar eru í mjög góðu formi," sagði hann. ,,Það setti strik í reikninginn hjá okkur að Sara Björk og Katrín Ómars hafa meiðst á mótinu."
,,Við söknum Söru mikið. Hún er orðin mjög mikilvægur hluti af liðinu og Katrín Ómars hefur glímt við liðþófameiðsli allt þetta mót og var ekki leikfær í dag eða síðasta leik. Sara missti af síðasta leik og þessum útaf meiðslum og í dag var María Ágústsdóttir líka meidd og ekki leikfær. Svo sendum við Guðný Óðnisdóttur heim vegna veikinda og mér fannst vanta aðeins inn í okkar lið hvað það varðar, við vorum ekki með fullan bekk útaf meiðslum."
Guðný Björk fór heim vegna veikinda sína en aðrir leikmenn voru með hópnum allan tímann. Sigurðu segir mikilvægt að hopurinn sé saman.
,Við tókum ekki þá ákvörðun að senda leikmennina heim. Við héldum okkur við þennan hóp. Ég á von á að kjarninn af þessum hóp verði í lokakeppninni. Auðvitað veit maður aldrei fyrirfram. Mér fannst líka mikilvægt að halda þessum hóp saman. Við vissum ekki fyrirfram að Katrín myndi missa af leiknum í dag og ég vonaði að hún gæti spilað en það gekk ekki."
Leikurinn gegn Bandaríkjunum sá besti undir minni stjórn
Ísland lék í heildina fjóra leiki á mótinu, vann þann fyrsta gegn Norðmönnum en svo komu töp gegn Bandaríkjunum, Danmörku og Kína. Sigurður er samt sáttur við útkomuna hjá liðinu.
,,Þær lögðu sig 100% fram í alla þessa leiki og ég held að við getum bara verið sátt þegar upp er staðið. Við vinnum Noreg sannfærandi í fyrsta leik, 3-1 þegar liðið er ferskt. Svo eigum við frábæran leik á móti Bandaríkjunum þar sem við fáum á okkur svekkjandi mark á lokamínútunni. Sá leikur var í heild frábær og einn sá besti undir minni stjórn," sagði hann.
,,Svo töpuðum við fyrir Dönum sem unnu Þýskaland 1-0 og náðu þar með þriðja sætinu í mótinu og eru með frábært lið. Þær ná örugglega langt í lokakeppninni. Svo vorum við óheppnar á móti Kína, nýttum færin ekki nógu vel en Kína nýtti sín færi í botn. Allan tímann vorum við inní þeim leik og alveg jafngóðar og þær ef ekki betri."
Vonuðumst til að varnarleikurinn yrði sterkari
Íslenska liðinu gekk mjög illa að skora á mótinu en eftir að hafa skorað þrjú mörk gegn Noregi tókst aðeins einu sinni að skora í næstu þremur leikjum. En er það ekki áhyggjuefni?
,,Jú kannski, við vorum að reyna okkur áfram í lágpressu núna sem er breyting fyrir okkur," svaraði Sigurður Ragnar. ,,Við höfum áður verið með liðið hærra upp á völlinn og ef við skoðum bara sóknarleikinn þá held ég að það henti íslenska liðinu betur að spila framarlega. Við erum með þannig leikmenn en við þurftum líka að prufa okkur áfram með lágpressu."
,,Við vorum að vonast til að varnarleikurinn myndi vera sterkari en nú höfum við aðeins verið að fá á okkur mörk á annan hátt en áður. Við fáum á okkur mark í gegnum hjarta varnarinnar, yfir hafsentaparið og stungusendingar. Þá hefur íslenska liðið verið að sækja og hitt liðið sparkað langt fram."
,,Það er eitthvað sem þarf að vinna með og bæta í okkar leik. Það hefur ekki reynt eins mikið á varnarleik liðsins á þennan hátt áður. Við höfum ekki spilað við leikmenn af þessum gæðaflokki sem geta hitt boltann svona vel innfyrir og framherja sem tímasetja hlaupin sín mjög vel. "
Mótið frábær reynsla
Ísland mætti fjórum mjög sterkum liðum á mótinu að þessu sinni sem er breyting frá því sem hingað til hefur verið þegar liðið hefur mætt veikari liðum. Þegar liðið fer á Evrópumótið í sumar mætir það einnig mjög sterkum liðum og Sigurður er á því að reynslan sem liðið fékk úr mótinu sé mikilvæg.
,,Það er mjög fínt að fá þetta mót þar sem reynir virkilega á liðið svo við getum unnið með þá þætti sem þarf að bæta. Það er engin spurning að þetta er frábært mót bæði fyrir leikmenn að sjá hvar þeir standa, núna höfum við status á því og getum unnið þessi lið á góðum degi."
,,Það er erfitt að halda stöðugleika í gegnum heilt svona mót, þegar það eru svona margir leikir á svona háu tempói. Að sama skapi getum við þjálfararnir líka lært af þessu og höfum séð margt sem við getum lagfært í leik liðsins og unnið að."
,,Það er svipaður styrkleiki á liðunum í þessu móti og við munum mæta í lokakeppninni. Þetta mót var frábær reynsla fyrir okkur."
Athugasemdir
