Nokkurra mínútna kafli undir lok fyrri hálfleiks og í byrjun seinni hálfleiks skilaði Skagamönnum tveimur mörkum og eftir það voru Eyjamenn alltaf á eftir við að reyna að komast inn í leikinn. Þriðja mark ÍA kláraði svo leikinn og náðu gestirnir sjaldan að ógna marki ÍA eftir það.

Jöfnunarmark ÍA kom Skagamönnum algjörlega inn í leikinn aftur á 39. mínútu. Arnar Már Guðjónsson átti frábæra spyrnu sem tryggði að leikurinn var jafn þegar flautað var til hálfleiks en það er spurning hvað hefði gerst ef Eyjamenn hefðu farið inn í hálfleikinn marki yfir.

Úrslitin þýða að Skagamenn eru komnir í áttunda sæti deildarinnar með 12 stig og eru núna fjórum stigum frá fallsæti. Þetta voru vond úrslit fyrir Eyjamenn sem með sigri hefðu komist úr fallsæti í fyrsta sinn í töluverðan tíma. Skagamenn unnu því í sannkölluðum sex stiga leik.

Þetta var vondur dagur fyrir varnarmenn ÍBV. Þeir fengu á sig þrjú mörk í leiknum og vörn Eyjamanna opnaðist á köflum alltof auðveldlega í leiknum.

Þóroddur Hjaltalín átti ágætan leik sem dómari leiksins. Hann hélt vel utan um leikinn og leyfði honum að fljóta.