Mist Rúnarsdóttir @MistRunarsdotti

Textalýsing Skýrslan Viðtöl

Hvað réði úrslitum? Kristín Þóra fékk eitt færi í leiknum og nýtti það. Það sama verður ekki sagt um sóknarmenn Blika sem fóru illa með sína sénsa. Blikar voru miklu meira með boltann og áttu fullt af sénsum en þeim voru mislagðar fætur fyrir framan Fylkismarkið. Það sem fór á markið sá maður leiksins, Cecilía Rán markvörður, um að verja. Bestu leikmenn 1. Cecilía Rán Rúnarsdóttir Markvörðurinn ungi hélt hreinu gegn bikarmeisturunum. Átti þrjár magnaðar vörslur og dílaði vel við fyrirgjafir Breiðabliks í leiknum. Frábær frammistaða. 2. Berglind Rós Ágústsdóttir Fyrirliðinn lék í miðvarðarstöðunni í dag og var framúrskarandi. Blikum gekk illa að komast framhjá henni og Berglind var oftar en ekki mætt á síðustu stundu til að hreinsa frá Fylkismarkinu. Atvikið Eina mark leiksins kom eins og þruma úr heiðskíru lofti! Fylkisliðið hafði varla farið yfir miðju þegar Kristín Þóra kom þeim yfir í sinni fyrstu sókn. Eitt færi og eitt mark. Alvöu færanýting sem dugði til.

Hvað þýða úrslitin? Bikarmeistararnir eru úr leik eftir ein óvæntustu úrslit sumarsins. Fylkir verður í pottinum þegar dregið verður í 8-liða úrslit. Vondur dagur Blikum virtist ekki ætlað að skora í dag. Þær Sólveig, Hildur og Berglind Björg fengu bestu færin til þess og hafa sannarlega átt betri daga. Dómarinn - 6,5 Tvö mörk voru dæmd af Blikum vegna rangstöðu. Án endursýninga er ómögulegt að segja til um hvort það hafi verið rétt og við gerum því einfaldlega ráð fyrir að svo hafi verið. Svo er spurning með rauða spjaldið í lokin. Blikum fannst Steinar hafa brugðist full harkalega við með að reka pirraða Hildi Antonsdóttur útaf þegar hún skammaði hann fyrir að dæma af sér mark í uppbótartíma. Ómögulegt fyrir stúkuna að meta þau samskipti.